[ZO-AW] Fwd: Zomi Angvaan Blog
By Voice Of Zomi - Sunday, September 2, 2012
Zomi Angvaan |
- Pawi Bawl Ni
- Zomi Hikeng, Utkeng
- CNA te leh Zote khuate
- ZNC/ZCD, ZRA, LZI, GZA, etc...
- Zomi Biakna Pawlpi Et kakna
- Nih Vei Ka Hai Hi Ci
- Siahtung Siahphei
- Zola In Muibun phadeuh No.1
- Khangnote' Pattah Huai
- Meitei (Kate) Koi Ci Uh
- USA ah Zomi tampi ki deih (azom)
- USA ah Zomi tampi ki deih
- Pu Cin Sian Thang leh ThangHo te Unau
- Zomiten Mang Anne maw, Zo Anne
- Naumin Phuak leh Sian Thu
- Nashville Thupiang Khat
- Pu Zo leh Zomi
- Ni Sim In Zangh Ni
- Zomi leh Chin Minam Vai
- Ki thu simlo
- Zo Peopel leh Zomi People
Posted: 01 Sep 2012 10:16 AM PDT Mikangte ngian pen Kawlten nektak cing dingin a zat uh ki kumto dih ni ee. Kawlte ngian icih pen hilo in mikangte ngian a zatsak uh hizaw hi. A zatdan uh a khengval hibek hi. Zomi te bel thuman lah hisi, thudik lah hisi ai ciang kuanzo ding hiam? Thuman i gen pen Kawlten a ngian uh hi ci se hi. Thu i manluat manin minam dang khempeuhte gen i muang ngam pahpah aa, mite a zuau tat manin eiten i hamsiat lawh zazen hi. Mual tung mi, khamtung mite ka thuzawhna dingin bang cih sep ding ka hiam cih Kawl kumpi khat in mangkang u lian pa kiangah a dotleh mangkang pa in na zawh nopleh a khuakhua ah gango inla ' Pawi Bawl Ni ' ci lecin zawhnop mahmah lel uh hi, ci hi. Mual tung mi, khamtung mi te pen PAWI bek ah nuamsa uh hi. Thu duhlo uh aa, sa duh lel uh hi. Tua bangin na hih zawhleh bangbang min pua Party tawh ki zo lel hi, ci hi. Tua thupen CNA ten na thei keu ahih manin Yangoon ah nung deuh in ki pan khinta uh hi. Zogam sungah hong ki pan pelmawh ding uh hi. A kua mapeuh in mualtung mite PAWI bawlzozo hampha kisa in ki uap tangtang nuamzaw lai hi. PAWI bawlna dingin sum kisamto zel hi. Minam ading sum bangzah om khinta ding hiam? Chin lamte na ki ging zihziah uh hih tuak hi. Ih ki tangpek ciat laitak ahih khak ding ka lau hi. Zomi min pua Party tawh Zogam ah ki teelna om hileh i zo takpi diam? Ih ki ginzia ih ki sak kholhzia thupi kha ding hi. Ih ki ziazia aa, thu neuneu tawh i buai khak aleh miten hong kheng ding uh hi. Bang cih ka makilh, ka kheng thei diam cih a ki salsal laitak uh hi. Tokhom lian theithei ki tuh hun om ding aiciangin Zomiten ih inn sungah Tokhom ih ngah zawh keileh midangten nuamsa mahmah ding cihna hipah hi. Mi hong muan thei ding leh ih makaih ngamding thupi hi. Malak danding ki theisakna lohtawh minam sungah lawhcinna omlo ding hi. Ki pawlna aomleh ki pawlna pan mun ki gual takpi aa, tangpi tangta theisak ki sam veve hi. Thumanlo in a gamta dingte hilo hi hang. Mimal nek cingding deihna hilo aa, minam nek cingding deihna tawh... Thawm Tuang Zomi Angvaan |
Posted: 01 Sep 2012 10:14 AM PDT Zomi nam sungah Vangteh, Saizang, Sihzang, Zote, Teizang... cih bangte huam kim hi. Hih thu ah hun khat lai-in Zomi sangin Vangteh mi kicih ding ka utzaw a, Zomi hi keng ka cih nop hun om peuh mah hi. Zan mah in a suak ka hi a, zan mah in Zomi hong piangtawm ka sa lailai hi. Hih bang lungsim ka puak vilvel laitak in bang teng ngaihsun ka hiam cihleh- 1. Vengteh awsuah tawh laigelh dending in, sum neihteh Laibu bawl in Vangteh sung panin Zomi hong piang khia cih bawl khia ding, Online tuamtuam ah a zon nuam in koi zihziah ding.. 2. Vangteh Baptist Church pan khia dingin Vangteh Lai Siangtho leh Labu teikhia zihziah ding... 3. Vangteh awsuah mah tawh lasiamte sum tampi tawh cial in DVD, CD thoh khia ding, Video a muh nop theithei thoh khia zihziah ding... 4. Vangteh mite omom na ah ki pawlna om sak pahpah in, kumcim khawmpi bang nei den ding... 5. Zomite ki zopna ki thuzakna sungah Vangteh tawh meh khawm pahpah ding, Vangteh a genkha a om leh mi 4 leh 5 in va su giapgiap ding, Zomi hi keng ci pahpah ding... 6. Vangteh mi a tamna Zomite ki khopna ah panla lel dingin Vangteh mi atam teh Zomi deihlo ziau ding... Hih a tunga bangin lungsim ka puak vilvel laitak in minam dangten ki pumkhatna tawh hong makhelh lam ka phawk kha kei a, kei tumtak in Vangteh mite hi ka sa mahmah lel hi. Hih bang ka ngaihsut laitak in hong pampaih theilo ka Zomi pihten... 1. Zomi party bang na ngah khin uh, Vangteh party ka mu batloh sungin.. 2. Ki pumkhat in thu le la na vaihawm khawm, ma na pang khawm mahmah uh.. 3. Vangteh, Teizang, Zote, Saizang... cih bang lungsimtoi na neih vetlo uh.. 4. Ken Vangteh mi ka thupisak mahmah hang, kua manlah hong awlmawh tham hong sa lo uh.. 5. Vangteh mi teng mite zasan meh khat zong ka phakloh lam ka theiloh sungin ka Vangteh miteng thuman thudik Zomi mah na pom tinten zaw uh hi. Keibek ki tang pek. Kei tawh ki bang lungsim toi, a ki phasak a om lai tam aw... tunbel thudik thuman ah na kalsuan theita ing. ZomiNam ka hihna a telcian panpan... Thawn Tuang Zomi Angvaan |
Posted: 01 Sep 2012 10:13 AM PDT Ni dangin CNA te ki ci ngamlo in Sangnaupang te ki ci se hi. CNA te a kheltatna giah phual pen Zote khua cileng ki khiallo ding hi. "Zote Khua" pen khuamin hi a, Ngur leh Tlangsam ki kal ah om in Tonsim panin gamla lo hi. Gamsung a Camp uh pen Nahlan gam hi a, kum 2000 zawhteh India gal kapte tawh ki tel khial in hong om thei nawnlo uh hi. Gam sungah giah phual hong neihloh zawhteh Zote khua leh adang khua teng panin Gan zuak gankaite tungah Siah tampipi hong kai uh a, hong khut khial vatvat uh hi. Zote khua tenzong a khua sung vuah suakta takin om sak lel ban-ah khua mite tawh mite ganzuakte matsak ziauziau ban-ah sum leh paai a neih zahzah uh sim mawhna tawh laksak thei ziauziau uh hi. Nek tawm leina ding uino akno zuak dingin a puakte uh va sut ziauziau uh hi. Pawl khatte damlo zato lumdingin a pai mite' sum na leng laksak uh hi. Piaknop leh piak noploh thu tawh ki sailo in laksak ziauziau uh a, a phal phalo omleh a Thau sialphei uhteh sat ziauziau thei uh hi. Hih thupen i maisak ta zongin a ki manggilh theilo thu ding ahihi. Dr. Vumson in CNA te gilohna tatsiatna ki ciamteh hi na ci hi. Mit tawh a mulo khatpeuh in va gum khathei a, amawh sak maimai peuh sa kha ding uh hi. Khua Hausa pawl khat hong thahsak sawnsawn lai uh hi. Zote khua leh khua dangdang panin hong tatsiat luat mahmah laitak in ZRA ten na nial mang uh cih thu a ki zakzawh sum dong dingin hong om nawnlo hi. Tua hi keileh lungdambawl kuan khawngah khua nu khua pa te na lunggim den uh hi. Mai lam-ah Zomite khua mun pawl khat ah hong dak geugeu uh leh, tuateh a kua mapeuh i ki theisak a, pan i lak ciat ding thupi kha ding hi. Zote khua bangin CNA te amau thuthu in gamta sak lo ding hi hang. Ih om na ciat ah Nam lungsim pua vilvel a, mipih sapihte gup vilvel ding ahihi. Nampi lah hi tuanlo i hihteh ih nam vai ah pilvang ciatni. Tua hi keileh hing mang khani. Na nampih uh..., Thawn Tuang Zomi Angvaan |
ZNC/ZCD, ZRA, LZI, GZA, etc... Posted: 01 Sep 2012 10:12 AM PDT Makai dinmun in ka lung sim tawngtawh ka om sawmleh veina neita teu lengzong a thubaih ding hi peuh mah lo hi cih ka mu hi. Sepzawh nei in, panpih zawh ih neita zongin hong ki pakta het keileh ki lawm hi. Mipih sapihte pahtak ut man tawh na sep ki pan ding hileng khat beek in a ki pan khia om ngamlo ding hi. Tuate tel siuseu in minam leh gam ading na semte ka zahtaak na, thupi ka sakna khang semsem hi. A hoih thuhoih lamin a la ding mi ki tawm mahmah lai, mi nam tam ki hi keei lo, mi nampi lah ki hilo, mi haupen mipil pen lah ki hi tuan samlo makaiten thuhoih genta leh ahoihlo lamlam in mipite ki tawk ngeingai, sepzawh septhei ki cianlah aneizaw hi tuan samlo ihih manin gam leh minam nasemte hawmtawh ngam huai hethet lo hi. Gam leh minam ading ki pawlna makaite in a mipihte adingin a hoihlo peuhmah ngahsun hetlo uh a, amau ki piak zawhzah tawh khasum sanna omlo pi mah in na sem tangtang uh hi ci-in ka thei hi. Minam ki pawlna makai, Biakna ki pawlna makai, Zomi minpua ki pawlna…cihte: Deihdeuh, Panpihdeuh ka neih sawmleh: Minam lungsim pua vilvel lo in makaite khat peuh deihlohna leltawh Zomi mintawh ki pawlnate langpan, gensiat ka sawmna pen ka ngaihsut kikteh minam lungsim a pua vilvel taktak ka hikei a, a ki neihtawm ka hilel hi. Ki pawlna hoih ka sakloh thupi ka sakloh, deihdeuh deihlohdeuh ka neih hangin minam itna veina neih vilvel/neih tatak hileng Zomi mintawh ki pawlna khatpeuh kuamah langpan gensiatna ding omlo a, bulphuh ki ciankhat nei in thapia panpih neih ding pen mihing dan ahih lam ka phawk hi. Gensiat ka sawmleh: Kei tumtak in ka gen siat sawmleh ka ngaihsun kik a, mipihte gensiatna peuhmah tawh a maban uh a khawl ding uh hi peuh mahlo, a maban uh a zomtoto dingte uh na hizaw. A gensia teng mah in a sep zawhna uh mukha in theikha leh phat kik seisai lai, i nam neu dan aw ei. Ka dem sawmleh: Makaite ka dem sawmleh makai dinmun a ngahna dingun a beisa in a sepna, ahun, a pilna, a piakna, a hanciamna te uh a ki pha baih dingte na hilo uh hi. Delh leng ka phalai diam cih ka ngaihsun leuleu a, makai peuh mah, amau minam adingin Pasian in asehsa a om dimdem khin bangin ka ngaihsun a, ka ta ka tu te sung panin Pasian in ama ding, a mipihte adingin hong piakna ding bek lam-etna ka neih ngam hi. Ka hawmtawh sawmleh: Amau dinmun a thei pi mah in a kalsuan zia uh ka hawmtawh sawmleh, kei tangmi khat in makai khat ka hawmtawh sawm mawk pen kei mi dangten hong theileh hong hawmtawh zawlai ven cia cih ka ngaihsun kik a, mite na sep zia, geelzia hawmtawh thei ding din mun a neih ka hi samloh pi ka kici kik hi. Sepzawh panpih zawh ka neita zongin makai khat peuhpeuh a hawmtawh tiltel ding mi ka ut sam kei hi. Kei in bang ka hiam? Zomi ka itna tawh Zomi te sungah sepzawh septheih ka neihzawh loh hangin Zomi mal khat ciat ka langpan, ka gensiat luatna ding ka thei kei hi. Ki pawlna khat peuhpeuh langpan leh mindai sak ding ka sawm ut kei hi. A hangin Zomi ka hihna hang ahihi. Ki pawlna khat peuhpeuh kumkhat kumnih be kaki mangding ki pawlna omlo ahih manin vaiphuak makai a neiten lungduai tak in hong sem ding uh aa, tang miten a hoihlo ih hawmtawhna om leh kum hong pai toto ding aa, na puah theih hun ah na puah hamtang in. Ciampel kei ni. Tuapen Zomibup itna hi. Hong piansak Pa' deihna hi. Thawn Tuang Zomi Angvaan http://zomi-angvaan.blogspot.com |
Posted: 01 Sep 2012 10:11 AM PDT Zomi sunga pawlpi tuamtuam te sung panin a nuai aa tengteng gawmkhawm in mapang khawmzo leng ih minam sung hong picin suah ding ih. Pawlkhat tawm cik khat tawh et khak dih ni. Ka mimal muhna ah: *RC ::* Pawlpi sung buaina aom lo pen RC pawlpi te etteh huai ka sa hi. Sep ding bawlding a geel aom leh ki thu mang diamdiam uh hi. Pawlpi sung vai khat peuhpeuh vaihawmna ah semkhawm nekhawm diamdiam uh hi. A ki thumang Pawlpi a hi uhhi. *Tuiphum::* Zogam ah pawlpi aom masa pen Tuiphum pawlpi ahih zah khat in Citak mahmah uh hi. Upna sandan hita leh ki vai phuak ziate ahi zongin a Citak pawlpi in ka mu hi. *SDA::* Biakna pawlpi tampi aom zongin a tawm a tam cihte ngaihsun sese lo in a biakpiak Ni uh a siangtho penin a zangh uh hi. A biak piak ni uh siangtho tak in a zangh phadeuhte leh a zahtak phadeuh te in ka thei hi. A siangtho tak in biak piak Ni a zangh pawlpi ahihi. *UPC:: * Zomi sungah pawlpi mi a tawm a tam cihte ah ki ngah se lo in Upna a neih pawlpi in ka mu hi. Lung khiatna ding tampi om ta leh a upna khat uh muang ngam phadeuh uh, um ngam phadeuh uhhi. *AG:: * Pawlpi sung, pawlpi pua ahi zongin Pasian leh gam ading ahih nakleh piak khiatna a hat phadeuh te a hi uh hi. Ki pia khiazo, ki pan khia ngam pawlpi in ka thei hi. Piak khiatna a hat pawlpi hi-in ka thei hi. Zomi sunga ih pawlpi ciat bulphuh teta lo in ahoih lam tengteng gawm tuah siam leng, ih minam sung khangto mahmah ding hi. *RC * pawlpi te bangin ki *thumang* ni-in, *Tuiphum *pawlpi te bangin *Citak*ve ni-in, *SDA* pawlpite bangin biak piak *Ni* siangtho in zangh ve ni-in, *UPC* pawlpi te bangin *Upna* neih ve ni-in, *AG* pawlpi te bangin *Piak khiatna* hahkat ve ni Zomi aw................ Thawn Tuang Zomi Angvaan http://zomi-angvaan.blogspot.com |
Posted: 01 Sep 2012 10:10 AM PDT Na hauh nop leh si masa phot in a kicih mah bangin gamdang na tun nopleh nihvei hai ngam masa phot in cih nop huai hi. Cimphawng khawm, dik lah diksa khawm ka hih manin gen suksuk leng hilo dia. Malaysia pan hong tung thak khat tawh ka ki ho uhleh keibel tei kisa pian, keibek vak thei ki sa pian, ki muang pian, kua mah tungah tua a cihna bang hiam cih dot kulloh ka ki cih laitak laklawh pi in khatvei ka haina Malaysia panin USA hong tung zanzan ing ci hi. Haina na cih bang haina a hia ka cihleh pau theilo, vak theilo, mi pau ta leh a gen uh theilo, an haina, zuu haina bel hi sam kei, ci hi. A tawpna ah tupna aneih pawl khat te thupi ka sa mahmah hi. Bang teng hiam cihleh: 1. Kei ka hai hangin kei sung panin mipil misiam khangkhia thei veve hi, ci hi. 2. Tu laitak mipil misiam te pianna tuun leh zuate kei tawh ki bang om in ka lam-en hi, ci hi. 3. Gan hing La a pian theina dingin a tha hatlo zaw Sakol sung panin La hoih mahmah piang thei veve hi, ci hi. 4. Pilna siamna pen ko hunin ngah ding haksa mahmah a, tu hunteh a hanciam a citak khempeuh in ngahzo ta uhhi, ci hi. 5. Ka sisan ka lungtang Zomi sisan/lungtang ahih manin ka suak ka khakte Zomi mah ahihi, ci hi. 6. Um gui a neu hangin a gah lianpipi pha a, ka khankhiatna a neu hangin ka khanggui lianpi pha thei veve hi, ci hi. 7. Mawngkung lianpipi a phak hangin a gah neu cikcik pha a, gamneu panin ka khankhiat hangin tu-in gam thupi panin a khanliante tawh ka nungta khawm ding ka hihi, ci hi. Hih thu ka zak ciangin tupna neih vilvel ding thupi mahmah ka sa semsem hi. Thawn Tuang Zomi Angvaan |
Posted: 01 Sep 2012 10:09 AM PDT Siahtung Siahphei ka piak ut kei, ka piazo kei a ci mi khatpeuh tuate ukna sungah om loh pah pen siangtho hi. A om pipi na piak nop kei tentan leh thuman tawh a nungta lo ban-ah ukna neihte tung pan ei ngah ding hamphatna ih sihdong ki ngah ngeilo ding hi. Ngah khamah lengzong khangkhat ih khom taktak diam. A hau in na muhte khang nih a khom suak uh hiam. Uk theina ngah khempeuh in Siahtung Siahphei kailo hi. Siahtung Siahphei kai te ukna sungah na omleh na piak ding mah hi a, na piak keileh misual/mi sinsia ( Damaih) na hilam ki phawk in. Amau ukna sungah aom mi khempeuh thukhun om bangin a sep dinguh a ngeina ahihi. Kamciam a piak leh a kam ciamna pelhlo tak in a piazo dingte bek in Siahtung Siahkai zaw uh hi. Nang khang panin hong pat khiat uh hi panpan lo hi. Pasian tuamtuam aom zongin a vekpi un Siah kailo uh a, Kumpi tampi a om zongin a vek pi un Siah kailo uh hi. Siahtung Siahphei a kai ukna lianpi aneihten a omlo sung panin hong kai/ngen lo uh a, a omsa phitphet sung ( na ngahsa ) pan bek in ih neihzah lak pan amau hong kaihzah, ngetzah i piak loh a phamawh ahihi. Tuapen thumaanna lianpen ahihi. Ka theihna sunsung USA gamtawh kong genteh nuam hi. USA gam ah Siahtung Siahphei ( Taxt ) ki lim lak mahmah hi. Na sepna ah nai 1:00 in $10 na ngah ding ahihleh na khut sung hong tun ciangin $9 na ngah ding hi. Van tuamtuam na lei a, na zat khiat nakleh Sawm Ah Khat siah ( Taxt) hong la uh hi. Sum na ngahna sung panin Sawm Ah Nih kumpite a hi ci-in ngaihsun pahleng lungnuam pah hi. Nai 1:00 $10 na ngah ding athu in hilel a, a taktak in ka ngah ding sung panin kei ah 8/10 hi. Ka deihna bulpi taktak kong gen nuam hi. Sawm Ah Khat pen na ngahna khempeuh lakpan Pasian neihsa 1/10 hi a, i ngahsa i khut tung hong tun khit teh piak hi pan hi. A om sa sung pan ahih manin i piak nop keileh guta bek hilo Damaih misual ihi hi. Koi mun ah pia ding inn ah thungetsak hong paipeuh, missionary khahna ding peuh in na zangh un hong ci dek lo hi. No na zeek lel in hong cilo hi. Tua leh koi mun-ah paipih ding: Ka biakinn ah a kimin/ a vek in Sawm Ah Khat hong paipih un( Bring ye all the tithes into the storehouse) ci bek hi. Mundan ah hong sawl dihdih lo hi. Mundan ah na paipih leh bang tawh ki bang hiam cihleh Lampi ngei aa Khaicii tuh tawh ki bang hiteh. Sawm Ah Khat thutawh kisai a buaiden a piakna amantak in a pialo ihcih te pen Pasian thu a hat tata peuh hi hamtang zaw hi. Biakinn ah puak ding piakding hilel aa ei a pia khiate zeek ding hong gen lo ahih manin va kankan sese zong kullo hi. A diktak in pia lecin bang hong kamciam, " Kei hong ze-et dih un; vantung kong khakte hongin, note-a' dingin na hoih tampi kong piakna na mu ding uh hi", hong ci hi.. Khai veivei maw..guta te peuh, thumanlo te peuh nuamsa zaw thei hi. Mite maipha peuh ngah nuam thei mahmah uh hi. A hih hang angah thupha thusia pen Pasian kamciam om bangin na ngah kim pelmawh ding hi. Zomi bupin a diktak aman tak in ih biakinn ciat ah pia leng, " Zomi nam te pen namdang khempeuh in note pen a nuamsa minam, hong ci ding uh hi ci lai hi. And all nations shall call you blessed: for ye shall be a delightsome land, saith the LORD of hosts. (Malakhi alian 3 sung sim ciat ni: Mihing te gen kikik sangin ki telzaw thamtham hiveh aw) Thawn Tuang Zomi Angvaan http://zomi-angvaan.blogspot.com/ |
Posted: 01 Sep 2012 10:08 AM PDT Sim leh mal, sak leh khang aom Zomite bangin hong gawm pen hiam cih ka ngaihsut ciangin Zola Lakam in hong gawmzo pen hi. Banghang!!! Zola ka ngaihngaih ciangin tua khuami tuate pau cih bangin ki khen theilo hi. Zolai in muibun phadeuh ka sa mahmah hi. Tu nai aa La hong ki hawmkhia Ngilhmawh Tunnu Album sunga Zo Daitui Vocal Band te la sungah Phualva cih tawh kisai in ka lungsim hong sukha ban ah hong bun pha mahmah hi. A la phuakte lah siam a la sa te lah siam ka sa mahmah hi. Zola a ki ci zong Lakam ki hello tampi om mah leh Ngilhmawh Tunnu sugnah Lakam tampi ki hel tangtang in thupi ka sa phadiak hi. Lakam a zangh phadeuh Lengtong Pauno zom hi ci-in ka ciamteh hi. Zomite ih ki ciamtehna phualva te koi om mangta, Ki betni kahpi thahbah ni Zogam lei hong lau gawpta, Bang ci bangin ki sam kik theih diam khangthak ten muban lo pi, Phualva te ki itna thu Zogam ah zangh thei leng maw aw.. Sakkik: Phualva tenna tulsing hoihteng ki phuk in ki halmang ta Ih gam lei bawl siasia ding maw a bawl Pa khasia lua hi, Khangthak momno lia leh tangte lailung ah hong geel kik aw. Phualva te ki itna la in ih Zogam hong zuun kik aw.. Zu leh va te belh theih ding in ih gam lei puah in zuunni Tanglai eden gam nuam bang in ih gam lei paallunna ding, Ih gamte halhal nawnkei ni singkung hoihte suan beh ni Tua hileh ih Zogam lei nuam Phualva ten hong zuan kik ding Sianmang hong piaksa ih Zogam aw puahleh zuun ding momno te Sianmangin pilna hong pia hen gamlei itna hong guan hen, Ei bek ki tangpek sawmlo in holim in tongkum khawm ni Tua hileh ih Zogam leiteng etlawm in hong paallun ding Hih La na ngaih ciangin Zogam zuunhuai puahhuai ih sa hiam? It taak ih sa hiam? Phualva tenna tulsing hoihteng ki phuk in ki halmang ta hiveh. Zu leh va te belh theih ding in ih gam lei puah in zuunni beekzo leng maw. zoplai ding..... Thawn Tuang Zomi Angvaan http://zomi-angvaan.blogspot.com/ |
Posted: 01 Sep 2012 10:07 AM PDT ZCF ki khop i neih mah bangin kumkhat in khatvei ih tenna munciat ah Khua Pawipi Bawl Huai sa mahmah ing. Khuapawipi ka cihteh ngeina tawh kisai khangnoten ei kam mahmah tawh a theihuai thute a theibehna ding uhleh a zat theina ding uh tupna tawh khuapawipi neih huaisa hi. Khua ka cihteh gentehna in: USA gam Tulsa Khua, Tennesse khua, Texas khua...cih bangte hi a, tua i neihzawh keileh Zogam a khua te ahi, Tuithang khua, Tuitum khua, Tuilang khua, Tuimang khua, Tuikhiang khua... cihtawh Khuapawipi bawl huaisa ing. Tua hun sungah- Kampau: A diakdiak in kum 10-30 ki kal khangno cih bangin ciangtan ding aa, kam dotna leh dawnna neih ding hi. Tua kam dotna leh dawnna ih neih ma kum pat lam-in Biak piakna mun ciat pan leh ZCF ki khop na te ah taangko masa ding hi. Tua kam dotna leh dawnna ah namdang pau a zangh te a zat zahzah sum ngam ding hi. Namdang pau 50 vei ciang a zat leh thudotna neih nawnlo ding hi( ciangtan khat neih ding cihna hi). Sum thalawh nailo a hileh a nulepa a sanggamten piaksak ding hi. Hih pen khua nu khua pa a kua mapeuh thukim pihna ki sam hi. Thu kim pihloh om sam kenteh ka ci hi. Zogam khua aa teng bek in Khua Pawipi a neihleh amau khua pau a cik theithei ki demna zong neihleh hoih mahmah hi. Bang hang hiam cihleh ih teenna mun kamzat te sungah ciinhuai theih huai tampi om veve hi. Ngeina: Khangno te tungah na pa sanggamte bang cih kisap, na nu sanggamte bang cih kisap..cih aa kipan theihuai te dotna bawl huai mahmah hi. Tua ban-ah ih ngeina Pu zuu kholh ih cih in kuate tungah kikholh, Naumin bang cih ki piak, Zomiten ni thupi bang zah neih ....cih bangin Khangno khangthak te tungah neihuai mahmah kasa hi. Zolai: Zolai theilo aom leh a ki piazo ten hilhna mun khat neihzo henla, a neihzawh keileh nu le pa te in amau inn ciat pan hanciam pih cih bangin hanciam huaisa ing. Tua hih keileh Biakinn Sunday School kahna mun ciat panin Zolai malgawm aki pat Zolai a theih zawhna dingun hilh huai mahmah hi. Lai Siangtho sim thei pah satsat leh a hilh sianu sia pa te zong minam ading leh Pasian ading nasem manpha a sem hi pah hi. Nulepa: Nu le pa ten zong Tate pilnang' theihnang' ahih nakleh hanciam pih in a ki hilhna munmun ah va paipih tangtang ding thupi hi. A hilh dingte vaidawn ding peuh ngakngak ding hilo zaw hi. Tuni ciangciang Tate pilna dingin sum tampi a beilawh ki tam hetkei leh ki lawm hi. Nu le pa ten hanciampih ni. Zomi makaite: Zomi makai panmun neih khempeuh in hih thu minam khantohna leh zuunna hi ci-in thupit lak huai kasa hi. Sepding geel ding tampi omte sungah ahelhuai thu in ka mu hi. Minam adingin neihsa leh thatang tawh khangnote pahtah huai hi. Ih muan ih suan ding khangno tampi neih hang. Lam a hilh a tawsawn thei ding mi muanhuai makai a munmun ah neih hang, pangkhawm sepkhop huaisa mahmah ing. Khangnote pahtah taak leh hilhhuai kasak manin tawmcik kong tangko hi. Thawn Tuang Zomi Angvaan http://zomi-angvaan.blogspot.com/ Phone: 615-944-9529 USA |
Posted: 01 Sep 2012 10:06 AM PDT Meitei Singnuai mite tu lai takin Tonzang Township ah bu sa in tampi om lai uh hi. Tuateh meitei gun nisuahna Ngeisok bawkmual nisuahna lam Thahdo kual leh Zote tenna mun tengah tam mahmah uh hi. Kawl kumpi in ki theimawh bawl in nuam tak in om sak uh hi. Biakna ki bang ahihna uh hang zong hi thei hi. Leitungbup pen Biakna tawh kalsuan in ki gum vilvel den hi. Biakna cihteh Buddah, Khristian, Hindu...cihte hi. EBC, ZBC, SDA, RC, UPC...cihte Khristian khat in kisim hi. Meitei singnuai galkap ten a kim vuah mi dang a pai dingte a theihna dingun handset tawi ciat uh a, tua banah khua tuamtuamte ah zong hausa upate leh kisam a sakte uh ki thu zaksakna dingin Hand phone tawi sak khin uh hi. Tua ciangin Zanggam lam ah a tam om na pi uh pen Khampat panin tai thum ( 3 KM) a ki gamlat na Khumnuai khua ah om uh a, tua lai panin gam sungah a om a mite nek leh dawn ding a ki tangsam khempeuh supply uh hi. Tua ma in Hau Kaang a kici pa pen hih Meiteite tawh ki pawl a, ahih hangin vai tuamtuam hang tawh Meitei te in deih nawn lo hi. Tu-in Hau Kaang pen CNF tawh kizop ding ngaihsun a, ahih hangin Zomi khangnote khihta ahih manin pan mun kician aneihloh laitak hi. Meiteite vai, CNA/F te vai theih na ciang khat neih bilbel ding hi. Meitei singnuai miten nungak adeihdeih uh ngah uh a, nungakten zong ngai thei mawhlo hi kici hi. A ki teengzong tampi om khin uhi kici hi. A hih hangin Meiteiten huntawmno sung bek ading deih uh ahimanin hun khat ciangin a teenpih numei te a nungsang ciah kik sak uh hi. Nungsang ciah kik cihteh ma'nawh lamte a phat om mello mawk zel hi. Meitei singnuai mi ten a teenpih a zi uh pen tu lamlam ciangin aciahsak ziauziau tamta hi ki ci hi. Nu thawi tam ding cihna aive. CNF/A te sang' in Meitei singnuai mite ki en theizaw hiam? ih gam ah aom hangin phamawh kisa lo lel hiam? kua mah in tua bangin deihloh luatna ih gen zom kei hi. Sum leh paai khua khempeuh ah hong dawnglo ahih man hiam? Ei a dingin siatna bawl lua lo lel dan hiam? Tualeh Meitei te koicih ding, tha leh ngal tawh pang ding maw, Kawl kumpi mahtawh pang ding maw, pan mun koi bangin la thei ding cih..hun khat lai in ih ki kum ngei khin aa, aban ding beita hiam? Thawn Tuang Zomi Angvaan http://zomi-angvaan.blogspot.com/ Phone: 615-944-9529 USA |
USA ah Zomi tampi ki deih (azom) Posted: 01 Sep 2012 10:05 AM PDT USA gam sung ih tunzawh kumkhat cin ma in Zogam aom zi leh ta te sampah leng manlang mahmah hi. Zi leh ta te USA a tunleh a sampa tun kumkhat sung zong ki hal manlo hi. USA a tung khinsa te Kawlgam ciah ding cih a ngaihsun pah dihdih om in ka um kei a, ahi zongin Zomi khat hihna tawh minam ading ka sep thei leh ka sepzawh ding bang cih a ngaihsun vive pianin mu ing. Sep khiatna aneih nailo te adingin ka cihna hi. Kote pawl ee. Tu kum 2012 ciangciang gambel hihna tawh USA gam a tung khinsa kum cing sa te atamzaw in sum zonding nasep ding mah masak zaw uhi. Laisin ding a ngaihsun tamlo hi. Pau siam ding hanciamlo nasep bek mah hanciam uh hi. Naupangte mangpau siambaih uh ahih manin nu leh pa te kamzat pi suakzo uh hi. Zomite ki tam simsimta ahi manin mun khempeuh ah kamlet Zomi ki ngah hi. Pau theihlohna tawh lungneu nang om lo hi. Zogam, India, Malaysia, Thailand panin USA pai dinga ki thawi Zomi tul tampite lamkal panin pau theihloh man maw, mite theibang thei ki sak lo man maw...cih bangin a lungneu tampi om thei ahih manin USA ah lungneu nang thu omlo cih ka gen nuam hi. USA pen a thumante leh nasep hanciam nuamte adingin hoih mahmah hi. Sepna thaman a ki ngahna gam hi. Mizogam, Kawlgam tawh ki banglo hi. Pilna a neihnuamte adingin hanciamtaak mahmah gam hi. Tu lai khang hunin haksatna gen theina ih tuakna tampite mailam-ah i minam phat tuamna ding hizaw hi. Tu tadih in a ki thehthang Zomite ihih hangin i ki thehthang loh hunleh pangkhawm in nasep khop hun hong tung pelmawh ding hi. USA pai nop manin inn mun, lo gam zuak khinsa tampite adingin lungneu luat ding ngaihsun keini. USA tung khin lecin vaisah mahmah a ki zo suak pah hi. Mikang pau ih siamloh manin zumkong mangkong ah Zomi cih thangtuam mahmah lel hi. Zomite tamna mun tuamtuam ah Zomi cih zumkong mangkong ah hong ki thei pahpah hi. Gamla pi i tun theina dingin kalkhat panin ki pan hi, ki ci hi. USA hong painuamte hong tung thei mengmeng leh a ut.... Thawn Tuang Zomi Angvaan http://zomi-angvaan.blogspot.com/ Phone: 615-944-9529 USA |
Posted: 01 Sep 2012 10:04 AM PDT Zomite mikang pau theilo siamlo USA ah tampi hong tung ziahziah leh minam bup in hamphatna ngahzo dingin lam-en ing. Bang tengteng hamphatna ki ngah ding hiam? Kua tengin tua hamphatna ngah ding hiam? Zomi Nambup in tua hamphatna tengteng ki ngah ding hi. A tom in gen leng. Mikang pau theilo, siamlo Pau theiloh pau siamloh pen USA ah Zomite adingin manh neih mahmah hi. Nuam mahmah lel hi. Zato, zum, bank zum cih bang tuamtuam ah i pai ciangin mikang pau ki theilo ki siamlo ahih manin Zum nasem ( officer) ten kamlet ding kua minam bang pau hong ci pah uh a, pau dangdang ki samlo Zomi ci ziau leng kamlet ding phone sung panin Zomite na ki ngah pah lian hi. Zo people va cih daldal se kullo Zomi ci ziauleng zum khempeuh ah Zomite na tu dimdem pah uh hileh ki lawm hi. A mel uh i muh khak loh hangin mikang pau in i ngei ah a pau lualua a om khitteh ei kam tektek tawh i bil panin zumkong mangkong ah ki suanglo tak in i vai khempeuh ki zo siang thei lualel hi. Zomi kamlet semte' tung mahmah ah lungdamna lianpi i ko hi. Tampitak in hih bang nasep semciat leng mikangpau asiamlo pautheilo te adingin tampi nuamtuam a, minam leh Pasian ading nasem hi kawm pah hi. Mikang pau a siam khempeuh in namdangten bang minam hong cihleh Zomi i cih tangtang ding thupi hi. Bang minam! Zomi people, Zo people cih tangtang kullo mi namdang ten zong Egypt, Mexico, Samaria, China, Japan na ci ziau lel uh hi. Eite in zong Zomi cih pah lianlian ding ahihi. Zomi hihna zumpih ding hilo hi. Zomi cih hong ki thei mahmah ding thupi hi. Leitungah Zomite minam khat Mi hingin i pian a ki pan minam khat ki hi pah hi. Minam thak khat hong piang cihna hilo hi. Kua minam tawh na ki tuah phial zongin mikhat peuh minam min ki zahpih theih ding hilo hi. Mi minam khat zong pi muh pahleh neubawl pah ding hi zenzen lo hi. A hi bangin om ding hilel hi. USA ah Zomi kampau kamlet tampi om in, English siamlo tampi omleng Zomi hong ki thei semsem ding hi. Zomi kampau kamlet tampi om ahi a, pau siamlo tampi USA hong tung mengmeng un. Thawn Tuang Zomi Angvaan |
Pu Cin Sian Thang leh ThangHo te Unau Posted: 01 Sep 2012 10:03 AM PDT USA gamte suahtakna ni hunpen 4 July 2012 hi a, zum khempeuh ki khak ahih manin ThangHo te unau online ah nuamtak in na ki ho thei uh hi. ThangHo lunglutna leh Lian Do lunglutna ki bangkhinlo ahih manin a thuzak uhleh a muhnop thu uh ki banglo hi. A ki ho na uh atom in: (ThangHo tomlak TH, Lian Do tomlak LD) TH: Dam maw nau Lian Do LD: Dam mah ing ei u TH: No lam-ah thu lamdang aom hia LD: Theikeng, tuni 4. July pen USA te Independence Day hiven maw TH: He hi mah, Pu Cin Sian Thang Zogam pan USA hong tun ding ni tawh ki tuak lianin ciapteh nuam peuhmah aive maw.. LD: aw.., Pu Cin Sian Thang na cih ka thei kei aa u, Crusade bawl ding cih sim :) , Malaysia lam pan maw, na lawm te maw..kua TH: Pu Cin Sian Thang maw na theihloh lawlawm nau. LD: hong gen ve. TH: Zomi innkuan USA Khawmpi tukum Tulsa khua ah om ding aa tua lai-ah Zinmangpi dingin a sap uh aive. LD: ko kiang panin tua khawmpi ah Bawlung suih dingin a paisawm hive ung. A dang thu ka thei khakei a. TH: ngenmah…Bawlung suihna pawipi ah Zomi ahilo namdang mi pawlkhat ki mawlsiam na gu kha ding uh ahi. Ka zak dan-ah namdangte nih lasim ding a ci a… LD: tua ki mawlna makaite' theisak kei peuh leng e, phamawh se ding hia, ka maikai pa'n a ci aa. Pu Cin Sian Thang na cih hong gen kik phot o u. TH: Pu Thang pen Zomi National Congress President khat hi. Zomi nam ading, gam ading genthei haksatna thuak in a sem venven mikhat hi a, tua ban-ah Kawlgam suahtakna dingah amapang mahmah mi kuhkal khat ahihi. Tua ban-ah Zomi nam hi na pi hang aa Kawl mite in hong simmawhna tawh Chin hong cih uh alungkim ngeingeilo mipa khat ahih ban-ah Leitungbup ah Zomi nam ki ciantak in hong ki ciapteh na ding amapang, a hanciam, thuak akul leh a thuak ngam minam ading nasem taktak khat ahihi. A tomcik in kei phawk khak vat tua bang dan hi. LD: aw hi maw u, Zomite adingin ih pu taktak aive maw. TH: he.., tua khawmpi ah a pai zolo suak ning…ih ki muh nop hang…, LD: hong pai lecin tu-a na gen Zomi makai Pu Cin Sian Thang zong mu ding hi ve cin… TH: ut taktak mah hiveng a lemloh na khat om aa, ahizongin ko omna state ah zong hong paina lo dia… LD: aw., u ka lawmten Bawllung ki sin kikni hong ci-in ki thuzazel ni maw. TH: aw hihen o leh…cidam in Zomi Innkuan USA ah hong lawhcing mahmah un. LD: aw.. Topa thupha maw TH: Topa thupha…bye.. LD: bye Zomi nam sungah minam ading a sem mahmah makai Pu Cin Sian Thang a thei tampi aom hangin khangthak momno ten na theikhin hetlo uh hi. Tukum USA ah hong paina hangin Leitungbup aom khangthak momno ten a theitel semsemna ding ahih ban-ah minam itna lungsim, minam veina lungsim khang semsem ding cih lam-etna lianpi neih ing. Mang lai in nuai ah…a theibeh nuamte adingin… On August 8, 1988 nationwide protests broke out against the ruling military demanding for democratic change in Burma. The Army killed an estimated 3,000 people during the crackdown of a month-long protest. After the crackdown SLORC announced to allow multi party election. The Zomi National Congress party was formed. In the 1990 elections the NLD led by Aung San Suu Kyi, General Aung San's daughter won a landslide victory, winning 392 out of 485 seats. The Zomi National Congress candidates Pu Chin Sian Thang from Tedim and Pu Thang Lian Pau from Tonzang won their seats. Pu Chin Sian Thang and Pu Thang Lian Pau had mutual meeting with Aung San Suu Kyi several times. NLD and ZNC enjoyed a cordial association. Aung San Suu Kyi and Pu Chin Sian Thang served as members of the Committee Representing People's Parliament, a group supported by 251 candidates elected in 1990. Pu Chin Sian Thang is the spokesperson for CRPP and has been frequently interview. by BBC and VOA. Gam leh minam ading nasemte hong lawhcing semsem hen. Thawn Tuang Zomi Angvaan 4 July 2012 |
Zomiten Mang Anne maw, Zo Anne Posted: 01 Sep 2012 10:03 AM PDT Mikangte mangkang i ci uh hi. Amau gam ah ih tunga i nekte mang an i ci se hi. Mangte nek ante mang an hi a, Zomite nek ante Zo-an cih ding ahizaw in ka thei hi. Zomi hi na pi hangin mikangte gam ah i om zenzen hangin ih nek ante mikang an cih pah laulau ding hilo hi. Mikang gam-ah ih om hangin Mang an ki ne sese kei, zingsang nitak Buhsih (An) mah ki ne ngekngek lel hi. Mikangten zing leh nitak Buhsih ne zenzen lo a, Buhsih ne mah uhleh Zomite nek danin ne lo uh hi. Mang an ci-in i nek hangin mangten ei mang-an ih nek danin ne lo uh hi. Zomiten mang anne lo na pi hanga bang hang amau dan cici ihiam. Gam tuamtuam ah ih om zongin ih nuntakzia nek leh dawn hi bawldan ki lamdang lo hi. Lengtong Pauno in, *" omta lehzong bawl theilo*" cih bang hong phawksak hi. A bawlsiamlo a theitheilo cihdan bel ihih samloh hangin namdangte nek ante Zomiten a tawntung adingin ki ne zo hetlo ding hi. Zo-an bang mah in nek ngekngek pen Anne bek in a kisim hi pan hi hang. Midan in ih gamta nuam mahmah zongin ih nek ih dawn mahmah zong ki khelzo mahmah lo ahihteh eidan mah zui ngekngek lelleng, minam ki cian khat in hong bawlpa a lung kimzaw in ka lam-en hi. Namdang lak ah amau dan ih om nop hangin ih mel ih sa zong ki lamdang tuanlo Zomi mel mah ki pua hi. Midan zong theiding thupi aa, ei danzong mite theihsak ding thupi sem hi. Midan bek thupi sak ding hilo hi. Ei leh ei minam dangte lak ah ih ki neumuh hanglah ih lungsim puakzia hong theihpih kuamah omlo aiteh ki neu ngaihsutna lungsim puak ding hi nawnlo hi. Ki liansak lua min mite awlmawhlo in neumuh pah ding hilo hi. A tawpna ah mikang an, mang an cih ih thangsak mahmah uh aa, mang-an takpi zong a tawntung dingin ki duh hethetlo hi. Zo-an mah zing leh nitak in ki ne zo pen aa, ih ci ih sa zong ei adingin hoih mahmah lel hi. Kuamah ki eng tuanlo hi. Zomi mah nuam zelzel ei. Zo-an mah nitak leh zingsang a ne te innkuan…., Thawn Tuang Zomi Angvaan http://zomi-angvaan.blogspot.com |
Posted: 01 Sep 2012 10:02 AM PDT Zomi khempeuh ih ngeina zatdan ki sitset lo ban-ah khuakhat leh khuakhat ih zatdan ki banglo tampi om lai a, ahi zongin ngeina bulpi ki bang kim hi. Ka telnop khat ah naumin sian "sian" cih adeihna ka telcian nuam mahmah hi. Naumin phuak leh sian cih pen ki banglo in ka thei hi. Kei theina tantan tawh ka gennuam a, a diklohna a ki cin lohna aom leh hehpihna taktawh nong genna dingun kong thum masa hi. Naumin a mawk phuaklo minam ihihi. Utpeuh min a tapsak theilo minam ihihi. Ta pasal masa pen pasalte' pianna pa ki tapsak a, a nihna ta pasal pen numeite' pianna pa ki tapsak hi. Ta numei zong tuadan mah in pai ngiatngiat hi. Khiatna neihtek mahin min a ki phuak ahihi. Tua hang mahin minzui in lungsim ki pua thei ki ci hi. Naumin sian i cihpen naumin a tangte bek in 'sian' thei hi. Ahi zongin omna gam ki banglo ahih a, ki pai banlo ahihleh naumin tangte' ta pasal (nauneite' sanggam pasal) khatpeuh in 'sian' sak thei hi. Bang hang hiam cihleh gam dangah unau a tung khawm tampi om a, nulepa Zogam ah om huh ahi manin a sanggam pasalte pen gam dangah nulepa dinmun hong hito pah hi. Naumin puak icih pen nauno neihten amin tapte aomloh uh hangin ganno khat ( sisan luanna/thungetna) tawh bawl thei uh hi. Naumin sian tawh ki bang lo hi. Unau melthei tanau pawlpi mi cih bangte tawh bawl thei hi. Zogam ah tu hunin a tamzat tam lua nawnlo a, gam dangah ki limzat sawm mahmah san ci hi. Tapa khat leh tanu khat ka neih taktak ciangin Zomi ihihna a thupit zia hong telbeh sak mahmah a, ih ngeina in ih minam hong lenkip hi cih ka phawk thak hi. Minam ki cian khat in ka pian mah ka nuam hi. Ngeina kician tawh a kalsuan Zomi nam ka hih khak mah ka lungkim pen hi. Naumin phuahdan zong tu hunteh abeisa a, i dahna i lunglenna cihte ki phuaknuam mengmeng lo hi. Mailam tate tute khangdongin thupha ih ngahna ding' 'min' ki phuak zaw in ka mu hi. Kei theihna tantan tawh itna sungah…. Thawn Tuang Zomi Angvaan http://zomi-angvaan.blogspot.com/ Phone: 615-944-9529 USA |
Posted: 01 Sep 2012 10:00 AM PDT Zomi ahilo USA gam sungah Naupang gu thei mi om hileh ki lawm hi. Zani 8 June 2012 zan nai 1.00am kim pawl in nasem ka ciah uh ciangin ka lawmte khat VISTAS APT ah ka kha a, Palik mawtaw 3 bang na om in, APT huang sungah mivom lomtang inn ngei ah ahonhon in na om uh hi. Nolenshville lampi dungah Palik te na tampeuh mah hi. A ki gen dan-ah ni pi kalkhat pai khin Naupang kum 6 a pha nailo Nih ki gu ci hi. Tua a gu te mivom te hih tuak a, tuni in ki man kha aidiam, ki theikha diam khat hih tuak hi. Hih thu ka ngaihsut ciangin a ki sam masa pen-ah Naupangte Nu leh pa, Naukem khempeuh mawh puak ahihi. USA gam sungah tunung deuh in mi khat in mihing sa ne cihtengtawh ka gawm tuah ciangin lamdang sa khawm, na sa khawm mahmah ing. Naupangte bek inn pua ah pai sak loh ding leh namdang peuh mah tawh ki ho sak suaisuai kul lo hi. Theih ngeiloh mite naa piakzong sang'ding hilo hi. Nang zong midangte ta peuh it huaisa in na khat peuh, tawinuam dan peuh in ki om theilo hi. Zomite lungsim bang namdangten pualo hi. Na tate khahzau ken. Innkuan sung ki makaih zia Naupangte tungtawn panin ki mu thei hi. Naupangno khat in mi zahtaak na mel neilo, kihtaak namel neilo cihpen tua innkuan ki makaih dan lipkhap huai mahmah ding hi. Tate ki tai theilo, ki sat theilo cih ngeina omlo hi. Na tate ki mai ngap sak inla, ki kihta sak in. Eite pawlbel tate ki maingap sak gawp, ki kihta sak gawp cih bangin ki om thei hi. Tate thuhilh theihloh ci-in na khahzau leh USA bek hilo gam khempeuh ah mihing gu thei om a, mihing sa ne zong om ta hi. Ki pattah in ki kemsiam ding hihang. Na nu leh pa, na zi leh ta, na sanggamte tawh a nuam theithei in Christian nuntakna tawh ki tuak in om in. Hih bek mah leitungah i lawhtak ding ahihi. Genkhial a omleh na belhtuah in, Thawn Tuang Zomi Angvaan http://zomi-angvaan.blogspot.com/ |
Posted: 01 Sep 2012 09:59 AM PDT Pu Zo i cihteh mimin hi. Minam min hilo hi. Pu Zo in suanlekhak neih in, tua panin Beh min tuamtuam in i om hi. Beh min ciat i neih zawhteh Pu Zo khang panin i sut nawn kei a, i Beh bulpi ciat panin i khang i sut hi. Pu Zo khang panin Khangsut vanvan i om kei hi. A hih hangin Zomi Nam khempeuh Pu Zo suan i ki ci hi. Pu Zo i cihteh Zogam sunga Saizang mi, Sihzang mi, Zote mi, Vangteh mi, Teizang mi....cih tampi minam te huam kim hi. Eite sungah Pu Zo suan ka hihi, i hihi cih ek nam liangin gengen kulse lo hi. Kua mah in i hikei hong ci peuh mahlohi. A bul deuh, a dawndeuh cih om tuamlo a, ki dang seh nang leh i bul lakdeuh nang Zomite sungah i neihloh ding thupi hi. Mi pawl khat in sanggam Zote minam bek a sa kha om a, amau sungah zong ko a bek hi a ci kha om thamtham hi. Pu Zo panin Zomi nam hong piang hi dihdihlo hi. Mi hing sung panin mimah piang hi. Zomi cihpen mimin hilo hi. Minam min hi. Tua ahih manin Pu Zomi ki ci ngeilo a, Zomi ki ci hi. Mimin bek ah Pu, Pa, Pi, Sia, Dr om bek hi a, minam min ah tuate om ngeilo hi. Minam min leh mimin a khentel theilo khangthak momno tampi om lai ding hi. Mimin peuh minam min sa in, a hahpan phadeuh ki om kha thei hi. Zomi nam i hi vek a, a buldeuh a dawndeuh om tuamlo hi. Tua ahih manin a kua mapeuh ki dang sehseh nang thu om lo hi. Zomi cih i gen leh Sihzang, Zote, Saizang, Dim, Losau, Vangteh, Teizang...tampi omlai huam pahpah hi. A nei tuamdeuh om lo hi. Tuateng khempeuh kampau pen Zopau kici hi. Zopau i cihteh Zote pau i cihna hilo a, tu-a i zat tangpen ahihi. Pawl khat in Tedim pau ci luanluan hi. Tedim khua ah kampau minding Zote, Thado, Sihzang, Paite, ...tampi omlai meetting uh a, tua lai ah khat pa in a meetting na uh Tedim khua min tamsak a, Tedim pau cini a cih, a thukim uh hangin a tuam vilvel in Tedim pau zat ding om lo a, a mau pauciat na zang lel uh hi. A mau pau ciat a zat uh ciangin kamlet ki samlo ahih manin Zopau kici leuleu hi. Pasian in Zomi in hong bawl ka lungdam. Thawn Tuang Zomi Angvaan |
Posted: 01 Sep 2012 09:57 AM PDT Pasal a tamzaw kawngnat manin nasep haksa a sa tampi ki om hi. Numei pasal kawngna zenzen in, kawngin bang mah sem thei keileh a poi penpen te lak ah khat hi hamtang hi. Suan leh khak zong ki neihlo ding hiven. Nasem ta keileng vaksuk vaktohna, innsung om mun panin naneng khat ki sem kha thei veve ahih manin tua mun-ah cidamna ding kei theina tantawh kong gennuam hi. Minam cidamna ding deihna tawh... A thupi khat khat ah van i lik/dom ciang: Naupang a gol khat, van a lianpian khat, van a gik pian khat peuhpeuh mun khat pan mun khat ah koih nuamin i lik ciangin i khe koih dan thupi mahmah hi. Ih khe pen kalka ( khuk tuahlo ding) in van lik hamtang leng cidamna tampi hoih hi. Kawng heklo hamtang ding hi. Kalka cihteh a hoih ciang ding khat genna hi. Na khuk nuai siah van khat peuhpeuh na lik ciang, na et ciangin na khuk ngasuk hamtangin, mi pawl khat in awn kenkan sa in en a, tuapen cidamna tawh ki tuaklo hi. Na khuk nuai siah van khat peuhpeuh na lak vat nopleh na khut munkhat ah nga masa inla na ki sam van la panin ki dop huai mahmah hi. Mawtaw sung panin vanlian i lik khiat ciangin i khuk munkhat peuhpeuh ah nga in van la khia hamtang ding, thakhat thu in van dom khia pahpahlo ding hi. Ih din tawh ki tangin vanlian i lik ding ciangin i awm ah nga masa ding hi. Na lik zawh phatloh khat hanciam pi-in lik sese ken, hong huh thei ding na inn sungah aom keileh na vengpa tungah huhna ngenngam zaw in, ki pasal sak luat hih munte ah hoih hetlo zaw hi. Pasian in hong kem lello dia cihcih huailo hi. Hih van lik/domna te ah ei mahmah i ki dop theihleh nung takna a ki kem thei mi ki suak ding hi. Nungak te muhna peuh, zi te muhna peuh, miten hat kei si e hong cih ding launa peuh tawh pumpi zawh lohding pi hanciam kankan na pen a haivaite lak ah ki hel hamtang leuleu hi. Ki kemsiam ciat ni. Thawn Tuang Zomi Angvaan http://zomi-angvaan.blogspot.com |
Posted: 01 Sep 2012 09:56 AM PDT U Thein Re Myint, Chin History a gelh, laikung pu kawlte i a gelhna ah, "Chin icih te pen a mau le a mau hi min tawh kisam lo hi, a taangmin uh pen, Zomi mah hi", ci-in gelh hi. Chin cih kamal pen AD 700 lai pawl pan in, kawlte tawh ih kizopna pan hong piang khia, kawlte ii hongsapna kammal ahi hi. Ih pu I pa lah hisamlo amin hong puakding lah hisamlo Kawlte hong minsapna lel pen ih pum letding hi peuhmah lo hi. Tu laitak kawlgam sung aa, a om Chin State zongh pen, kawlpau izatpih hi in, kawlte hong piaksa min a kivawh hong hi phot hi. BC 1027-256 Sengamah Jo (Zo) vaihawm lai hi. Hih ciangciang tawh et khak leng kawl mite hong puahtawm min Chin pen AD 700 hun hi a, Zo cih kammal BC 1027 lai-in na ki zanghzangh khinta hi. 4 AD Zomite in Dangka (Taka) na na nei khin dingin ki-ummawh hi. 750 hun pawl in Pu Penglam, Pu Dahpa te hun hidingin ki lam-en hi. 1891 kuma British-te in Zogam bup hong lak zawh phet panin Zogam leitang teng hong phelkham pah uh a, Southern Lushai Hills pen Bengal pan, Northern Lushai hills pen Assam pan, Chin hills pen Burma pan leh 1894 kuma Zogam leh Manipur gamgi a kigitna panin Zogam maal lam teng Manipur awp sung a suahna tawh Zogam pen phel li suahin hong ukcip uh hi. 1937 kuma Ciau lui dung zuia Kawlgam leh Vaigam gamgi a kibawl leuleu ciangin Zogam pen India leh Burma-ah phelpi nih hong kisuah kik a, East Pakistan (tu-a Bangladesh) in 1947 kuma British tung pan suahtakna hong ngah panin Zogam pen India, Burma leh Bangladesh cih gam thumah kiphelkham leuleu-in tu dong namdangte khutnuai-ah I om suak hi. Gam khat sungah zong State tuamtuamah hong kibalnen sawnsawn lai ahih manin i gam i minam pen kitamzanin minam thupi ding kimlai minam tavai mahmah khat I suah lawh hi. Unau ciitciat pen a kithei ngeilo gamdangmi ciat hong kisuakta hi. Unau khat ciltel pen, Indiami, Burmami, Bangladeshmi kici ta a, ahihhang in sisankhat ineihkhop lam phawk gige ding kisam hi. Mual leh guamte i hong khen a, kizopna ahaksatciang in, ipaute zongh kilamdang bialbual ta a, kamzat kibatlo ciang minamdang tuampi khat ikisa ta hi. Midang te'n hong zatpih nop ta kei leh Zomi ii huam teng pen, Chin State, Mizoram State, Bawmzo Bangladesh, paite Manipur State, leh kawlgam Chin State pualam aa teng Sagaing, Magwe, Arakan zaangam aa om ei mi khempeuh huamgai hi ci in saan ding kisam mahmah hi. A taktak in Chin sang' in Zomi mah in tangzaizaw thamtham cih ih telding thupi hi. Zomi in tangzaizaw kei zenzen lehzong a ki pampaih theihding hi zenzen lo hi. Zomi Nam Ni tawm genbeh leng 1948, Fenruary 20 nia Falam khua-a Zomi nam bup Khawmpi pana Ukpite a kiphiat theihna leh tua phawkna hang tawh February 20 ni pen Zominam ni in a kiciamteh a sa pawl ki-om a, mi tampi takin Zomi Nam ni' hong pianna thu leh a deihna tel lo uh ahih manin Zomi Nam ni pen a man phat ding zahin manpha zolo a, poi mahmah hi. Bang hangin Zomi Nam Ni dingin February 20 ni kiteel hiam cih ciangin, kum sim, February 20 ni ta in i minam sungah khanlawhna, kikhelna leh thupha a tuamtuam a nuaia bangin hong tung zel ahih man hi: 1918, February 20 ni-in "Zomi Siamsinna Tawsawn Pawl" cih kipawlna hong piang hi. 1928, February 20 ni-in political organization masa pen "Zominam Kipawlkhawmna" cih hong piang hi. Zomi Nam Ni pen Zomi cih ih ki ciamteh patni hi zenzen lo hi cih a tunga ki pawlna tuamtuamte panin ki lang mahmah hi. Mi pawlkhat in Zomi cih kammal a ki zatzawh kum 10 phapan hi a ci zenzen om hi. A taktak in Zomi cih kammal pen Jesu suahma BC hun pek panin ih neih Mi NamMin ahihi. A tawpna ah: South America gam abang, continent khat hi in, Spain te ii uk takciangin, amau pau beimang sak in, Spain pau bek zanghsak mawk uh in, spain mi vive asuak hong hi tamawk uh hi. Gam tampi spain pau bek in, kiho ta uh, amau pau mangthang sak khin ta hi. Zomite zong ih omom na ah ih pau ih ngeina ih zat mahmah kei leh ni mangthang ahing mang mi ki suak thei thamtham ding hi. Zomi Nam om hi ci-in ih gen zawh nungah hong theihkhalo aom phial zongin eite in ih zatzat ding hilel hi. Mi hong theih khak loh ciangin minam mangthang a suak dingin Zomi Nam hong piang khia hi zenzen hilo hi. Et khak na munte: · Zomite' Tangthu ( VaphualNet) · Zomi Nam Ni 2009 ( Pu Tongseal) · Zomi Nam Ni 2011 ( Pu Cin Sian Thang) · Febuary ni in Zomite hong siam hi ( Pu J.Thang Lian Pau) A kaikhawm, Thawn Tuang Zomi Angvaan 28 May 2012 http://zomi-angvaan.blogspot.com |
Posted: 01 Sep 2012 09:52 AM PDT Kawl kumpiten Zomite hong thusim lo ban-ah Zomite ih ki pawlna khat leh khat ki thusimlo lailai hi hang. Ei ma ki pawlna ciat bek thupi sa in, ei ki pawlna lo peuhpeuh Thusim lo cih hi pahpah hi. Gensiat zawsawn dingleh phatzaw sawmding om ka sa kei hi. Ih sepnop khat ki bang na pi'n a sem sunsunte ki tawsawn theihna munpan tawsawn a sawm nuamlo minam tawmte i hi sawnsawn hi. A sem sunsunten amau thu bek thusa mite ngaihsutna lutsak nuamlo midang thusim tuanlo, awl mawh se lo semsem lel, lawhcinleh ei ki pawlna ahampha amin ngahding cihbek hileh ki lawm hi. Pasian na semten gamvai na semte thusim sese lo, gamvai na semte zong a suksem, i tupna lah ki gamla hetlo, ki pumkhat nuam tuanlo mipiten bang lawh ding a hiam? Mipiten makaite guptuam paihtuam neihto lailai, a sem tatak lah ki tam nai samlo, ki thu simlo ciat tawh ki nungta toto hi. 'Ei leh ei ki sia leng kuan hong gum ding singta gam lai ah,' JK Kam in la in veina taktawh na phuak hi. Tuhun din munpen kuamah ki thusimlo hun, ahih hang bang mahlah ki hi heulo, bang cih mawk ding i hiam? A tawpna ah a sem abawl ding khempeuh ki gawm khawmin khat ah pangin i pankhawm keileh mimal khat, ki pawlna neuno khat tawh mipi lungkimlo ding a, hamphatna bang mah ki ngahlo ding hi. Thawn Tuang Zomi Angvaan http://zomi-angvaan.blogspot.com/ |
Posted: 01 Sep 2012 09:51 AM PDT Dr. Cin Do Kham in Zomi Peoplea zat pen Zomi khenkhat ten diksa lo a, ahi zongin Zomi 98% bangin diksa in kalam-en hi. Zomi People cih i zatna pen Mikangte tung, Zomi ahilo te tung bek ahi zangh a, a tello kuamah om kenteh cih ka um hi. Mikang, namdangte tung panini pau i kammal, i minam i ngah hi masa lo hi. Dr. Vum Son in Zo History cihlaibu hong bawl khia hi. Hih ' Zo ' bek a cihteh khenkhat in Zote a cihna bek hi, ko bek hong gennahi a ci pawl om leuleu hi. Zote bek a genna hileh Zote History cilel ding a,Sihzang bek a genna hileh Sihzang History ci lel ding hi. A dangdangte zong tuabang mah, Pu Vonson in Zosuan tengteng a genna ahihi. Lai-in i gelh ciangin Saizang pen Sai zang, Tedim pen Te dim,Sihzang pen Sih zang, Zote pen Zo te, Vangteh pen Vang teh cih banginlaimal ki khen ngeilo hi. Ih minam minpen Zomi hia a, Zosuan ih hi vek hi. Zo People i ci a, Zomi People ici ta zongin a theilo kuamah i om kei hi. Zomi cih a neihtuam kuamah omlo a, Zocihbek zong aneihtuam omlo hi. Saizang, Sihzang, Zote, Vangteh ( adang om lai)i cihte pen i tenna zial a, min ki vawhna hih tuak hi( Dr.C.Thang Za Tuan).Tuun sung khatpan i hih zia ki tel pah hi. Hih vai ah ki totna ki lung nopmawhsakna aom phial aleh unau ki tawng/kisel hilel hi. Lungsim ah zong kep cingtakkasa kei hi. Zomi cihna sungah Saizang, Sihzang, Zote,Vangteh, Teizang….cihte ki hel ahihlah ih thei hi. Zomi sung ciatciat ah Zomi aki neihsak deuh, a ki tuam ngaihsut deuh i omloh pen ahi ding mah na hilel hi.Deihloh penin hih i tenna zil a, min ki vawhna min bulphuh lua zazen in Zomi kahikei a ci a om zenzen leh amah leh amah pil ki sa lel, kuamah awl mawh se lolel, thutuam satnuam lel cihna hi a, hihbang miten ki lemding, ki pumkhat ding,pang khawmin na sep ding cihte ngaihsun khalo uh hi. Hih bang mite makai peuhut lailai in, mun pawlkhat ah ngah thei mahmah zawlai uh hi. Tunsung khat pan aa piangZosuante vive hi hang. Kuamah a tuam omlo, Zomite ih hihi. Thawn Tuang Zomi Angvaan http://zomi-angvaan.blogspot.com/ |
1. The people of Zo is "Zomi"
2.The land/country of Zomi is "Zogam"
3. The language of Zomi is "Zopau"
4. The litelatures of Zomi is "Zolai"
Group email: zo-aw@yahoogroups.com
Moderator email: voiceofzomi@gmail.com
Blog site: voiceofzomi.blogspot.com
Follow our blog on Twitter, become a fan on Facebook. Stay updated via RSS
0 comments for "[ZO-AW] Fwd: Zomi Angvaan Blog"